Nesketan artean onena, Alaia Amubieta
Txapeldunak Errenteriako Aitor eta Uxue Arrieta izan ziren, baina nesketan onena Alaia Amubieta izan zen. 22 bikotetatik 13 azpeitiarrak izan ziren.
Santo Tomas Egunean jokatu zen Gazteen IX. Dantza Sueltoko Txapelketa. 22 bikotek hartu zuten parte eta horietatik 13 herrikoak izan ziren. Hala ere, txapela Errenteriako Aitor eta Uxue Arrietak irabazi zuten. Nesken artean onena, ordea, Azpeitiko Alaia Amubieta izan zen. Mutiletan, berriz, dantzari onenaren saria ere Aitor Arrieta errenteriarrak jaso zuen.
Parte-hartzaileetan bikote gehienak Azpeitiko Dantza Suelto Eskolakoak izan ziren, 13 hain zuzen. Txapelik ez zuten eskuratu baina egindako lanarekin gustura gelditu dira, hala dio Dantza Suelto Eskolako irakasle Luis Alberdik: "Pena izan da txapela ez irabaztea, baina lehen sei postuetatik bost eskuratu ditugu eta pozik gaude. Herrian dantza egitea beti ere zailagoa da, jende artean lagunak, senitartekoak... egoten direlako".
Nahiz eta hotz handia egin jende askok jarraitu zuen dantza txapelketa eta oso gustura gelditu dira antolatzaileak.
TXAPELKETAKO LEHEN SAILKATUAK
1. Aitor eta Uxue Arrieta (Errenteria).
2. Maialen Aldalur eta Amets Amubieta (Azpeitia).
3. Asier Ibarguren eta Garazi Gurrutxaga (Azpeitia).
4. Mikel Subinas eta Miren Ibarzabal(Azpeitia).
5. Aitor Exposito eta Alaia Amubieta (Azpeitia).
6. Ioritz Galarraga eta Laura Olaizola (Azpeitia).
Dantzarietan mutil onena:Aitor Arrieta (Errenteria).
Dantzarietan neska onena: Alaia Amubieta (Azpeitia).
